Par dessoz l'ombre d'un bois Jean de Braine Pastourelle
Par dessoz l'ombre d'un bois Trovai pastore a mon chois Contre iver ert bien garnie La tosete o les crins blois Quant la vi senz compaignie, Mon chemin lais, vers li vois. Aé!
II
La tose n'ot compaignon Fors son chien et son baston ; Por le froit en sa chapete Se tapist lez un buisson; En sa fleüte regrete Garinet et Robeçon. Aé!
III
Quant la vi, sotainement Vers li tor et si descent Si li dis: « Pastore amie, De bon cuer a vos me rent : Faisons de fueille cortine, S'amerons mignotement. » Aé!
IV
« Sire, traiez vos en la, Car tel plait oï je ja. Ne sui pas abandonee A chascun qui dit: « Vien ça. » Ja por vo sele doree Garinez riens n'i perdra. » Aé!
V
« Pastorele, s'il t'est bel, Dame seras d'un chastel. Desfuble chape grisete, S'afuble cest vair mantel. Si sembleras la rosete Qui s'espanist de novel. » Aé!
VI
« Sire, ci a grant covent Mais mout est fole qui prent D'ome estrange en tel manière Mantel vair ne garniment, Se ne li fait sa proiere Et ses bons ne li consent. »
Aé! VII « Pastorele, en moie foi Por ce que bele te voi, Cointe dame, noble et fiere Se tu vueus, ferai de toi. Laisse l'amor garçoniere, Si te tien del tot a moi. » Aé! VIII « Sire, or pais, je vos en pri N'ai pas le cuer si failli Que j'aim mieuz povre desserte Soz la fueille o mon ami Que dame en chambre coverte, Si n'ait ou cure de mi. » Aé!